Mesazhet e gabuara të UEFA-së

Vendimi i UEFA-së në lidhje me ndeshjen e ndërprerë Serbia-Shqipëria ka qenë tërësisht kontravers dhe në kundërshtim me atë që e proklamon kjo organizatë futbollistike. 

Vazhdueshëm, UEFA-ja thotë se siguria e tifozëve është shumë e rëndësishme, huliganët duhet të jenë jashtë stadiumeve, duhet çrrënjosur racizmin dhe motivuar edhe më FairPlayin. 

Mirëpo, ata vetë vërtetuan se vetëm flasin, por nuk punojnë. E nëse nuk punojnë ata për këtë, pse këtë ta bëj Serbia?! Kujtojmë, është fjala për një përfaqësuese që ka përsëritur incidentet dhe asnjë vend tjetër nuk është i përafërt me ata nga ky aspekt. 

Nuk bëhet fjalë këtu për transparente dhe mesazhe, fjala është për dhunë dhe racizëm. Italia, Anglia dhe Shqipëria. Të gjitha këto në një kohë të shkurtë. 

A jemi naivë?! Huligani i dëshmuar Ivan Bogdanov nuk do të mund të hyne në terren dhe të udhëheqte sulmin ndaj futbollistëve shqiptarë pa pasur leje nga instancat më të larta. Ai e ka vendin në burg, por gjithmonë e menjanon atë me vendime të çuditshme të gjyqtarëve. Nëse dikujt i intereson, atij nuk i ka ndodhur asgjë edhe pas ndeshjes me Shqipërinë. 

T’i kthehemi UEFA-së dhe asaj çka sinjalizoi me dënimin. Mesazhi i parë është se siguria nuk është primare. U dha mesazh të gjithëve se edhe nëse keni të rrezikuar jetën, duhet të luani ndeshjen. Edhe nëse huliganët ju sulmojnë nën mbrojtje të policisë, futbollistët nuk duhet të lëshojnë fushën ngase do të mbesin pa tre pikë dhe pa 100 mijë euro! 

Vendimi nuk arsyetohet edhe me gjetjen e ‘zgjidhjes solomone’, ngase këtu vetëm Shqipëria humbi. Një përsëritës i incidenteve, Serbia, u dënua me dy ndeshje moslojë dhe me 100 mijë euro, ndërsa për lejimin e futjes së huliganëve në fushë ndaj Shqipërisë u shpërblye me fitore 3-0. Ndërsa për të shpërlarë krejt, UEFA-ja ua morri tre pikë. 

E vërteta është se, flamuri që e mbante fluturakja është për tu dënuar dhe provokoi reagimin, mirëpo si lejuan organizatorët që ajo të arrinte cakun?! Kjo nuk i shkon përshtati shqiptarëve. Mirëpo po të ndodhte një gjë e tillë në Kroaci, në Maksimir, një flamur me Serbi të madhe, do të reagonin njejtë lojtarët tanë, sikur Mitrovici, ndërsa serbët do të vraponin për ta marrë atë - do të vinte te përleshja mes lojtarëve dhe reagimi i publikut. Por - e vetmja arsye pse policia është aty - që të mbajë tifozët në tribuna, drejtësinë për atë që ndodhë në fushë e përcakton referi dhe delegati. 

Të gjitha këto UEFA i la në një anë dhe dënoi Shqipërinë se nuk dëshiroi të vazhdon ndeshjen. Si do të dukej një lojë e tillë deri në fund, ku huliganët jo vetëm që goditën futbollistët e Shqipërisë, por edhe fyen kryeministrin e vetë Serbisë?! 

Me siguri një ndeshje e tillë nuk do të përfundonte asnjëherë, derisa pasojat do të ishin më të mëdha - e atëherë gjithçka do t’i ngarkohej Serbisë. 

Jo. Është e qartë se me këtë vendim dhe çfarëdo që të ndodhë në terrene në të ardhmen do t’i mbetej si njollë UEFA-së. E rasti i ardhshëm është 8 tetor 2015, kur Serbia shkon në Shqipëri. Bravo UEFA!