Mourinho vs. Guardiola, histori dhe rivalitet

Në prag të derbit të Manchesterit, padyshim që vend për koment lë edhe dueli mes dy strategëve, Jose Mourinhos dhe Pep Guardiolas, për të cilët ky nuk do të jetë takimi i parë kundër njëri-tjetrit. Për më tepër, 20 vite më parë Guardiola dhe Mourinho ishin miq të mirë, duke qenë se Jose Mourinho ishte pjesë e stafit të Bobby Robsonit te Barcelona, ndërsa Pep Guardiola asokohe ishte qendërmesfushor i skuadrës katalunase, mirëpo kjo miqësi ‘u shua’ kur portugezi dhe spanjolli u bënë figura të rëndësishme në krye të gjigandëve të ndryshëm evropianë.

Ndeshja ndërmjet dy skuadrave nga Manchesteri ka qenë gjithmonë interesante dhe rivaliteti nuk ka munguar në 5-6 vitet e fundit, mirëpo vëmendja është shtuar edhe më tepër pas ardhjes së dy prej trajnerëve më të mirë në botë të viteve të fundit. Rivaliteti i tyre i madh njihet tash e sa kohë, ndërsa në bazë të intervistave të ndryshme shihet që dy trajnerët nuk e pëlqejnë shumë njëri-tjetrin, me ‘inatet’ që janë shtuar dukshëm prej vitit 2010, vit në të cilin Jose Mourinho me Interin e tij e eliminoi Barcelonën në ‘Camp Nou’ në gjysmëfinale të Champions Leagues.

Le të shohim disa statistika mes trajnerëve:

TITUJT

Që të dy kanë fituar nga 2 tituj të Champions Leagues. Jose e ka fituar këtë trofe me Porton (2004) dhe Interin (2010), kurse Guardiola me Barcelonën (2009 dhe 2011). Te titujt evropianë mund të përmendet edhe triumfi i Mourinhos në Europa League (Kupa UEFA e vitit 2003 me Porton). Spanjolli Guardiola po ashtu e ka fituar 3 herë Kupën e Botës për klube dhe 2 herë Superkupën e Evropës, ndërsa Mourinho nuk ka fituar asnjë nga këta trofe, pasi që ai veçse ishte larguar nga Porto, respektivisht Interi, menjëherë pas shpalles kampion i Evropës në maj të viteve përkatëse.

Kur jemi te titujt e ligave, Mourinho ka fituar 8 të tillë, kurse Guardiola 6.
Sa i përket kupave të ligës, Jose ka fituar 7 ndërsa Pep 4.

Që të dy trajnerët e kanë arritur tripletën nga 1 herë, Mourinho me Interin, Guardiola me Barcelonën.

PËRBALLJE DIREKTE

Jose Mourinho dhe Pep Guardiola janë takuar mes vete 16 herë. 7 herë ka fituar spanjolli, 3 herë portugezi kurse 6 ndeshje kanë përfunduar me barazim.

11 prej këtyre takime kanë qenë mes Realit e Barcelonës. 4 takimet e tjera ishin mes Interit e Barcelonës. 2 takimet u luajtën në grupet e Champions Leagues (Sezoni 2009/2010). Në Itali ndeshja përfundoi pa gola, kurse në Spanjë Barcelona fitoi 2-0.

Në të njëjtin sezon, skuadrat u takuan në gjysmëfinale. Interi i Mourinhos fitoi 3-1 në shtëpi, ndërsa në ‘Camp Nou’ takimi u mbyll 1-0, rezultat që e dërgoi Interin në finale, për t’u shpallur më pas kampion i Evropës pas fitores me Bayernin.

Golaverazhi në këto 16 takime është 26-16 për Guardiolën, ndërsa mesatarja e golave në këto ndeshje është 2.6 gola për ndeshje.

Fitorja më e thellë në përballjet direkte është ajo e Barcelonës ndaj Real Madridit me rezultat 5-0 në nëntor të vitit 2010.

Siç shihet, në përballje direkte Guardiola ka një avantazh, kurse te trofetë e fituar dhe përvoja në Premier League, Jose Mourinho ka një avantazh. Se kush do ta fitojë derbin e Manchesterit, mbetet të shihet nesër me fillim nga ora 13:30.