Ndeshje për Ibrën

Fitorja e Barcelonës me rezultat 1-3 në Parc des Princes të Parisit javën e kaluar, bëri që shumëkush të eliminojë Paris St Germainin nga Liga e Kampionëve. 

Mirëpo, në ndeshje të tilla, posaçërisht në çerekfinale të Ligës së Kampionëve, është vështirë të thuhet një gjë e tillë. Parisienëvë sonte i kthehen Zlatan Ibrahimovic dhe Marco Verratti, që i munguan në ndeshjen e parë. 

“Kthimi i Ibrahimovicit nuk i ndërron gjërat, sepse Parisi luan në stil të njejtë. Natyrisht, kthimi i tij dhe Verrattit do t’ia shtojnë cilësinë ekipit të Parisit. Ne në ndeshje nuk hyjmë për barazim, si gjithnjë, luajmë për fitore,” ka thënë trajneri i katalonasve, Luis Enrique, në konferencë për shtyp. 

Në anën tjetër, Paris St Germain, nuk e ka problem shënimin e golave, sa e ka pranimin. Dhe kjo, jo për shkak të mbrojtjes së dobët, por për shkak të kundërshtarit të fortë. 

“E dimë se kemi punë të vështirë. Kemi pak mundësi që të shënojmë fitore, por edhe më pak mundësi të mos pranojmë gol sonte. Ta ndalësh Barcelonën në zero, është thuajse e pamundur. Ne nuk kemi çka të humbim dhe kjo është një ndeshje e tillë që e ka për qejf, Ibra,” ka bërë të ditur Laurent Blanc, trajneri francez i Paris St Germainit. 

Barcelona ka epërsi dy golëshe nga ndeshja e parë, të cilën e fitoi 1-3 në Paris.