SULMI I ATLETICOS

Në kërkim të pasardhësit të Diego Costas
3 July, 2014 @15:03
Atletico Madrid njihet si një skuadër që gjithmonë në përbërjen e saj ka pasur së paku një sulmues të nivelit botëror, që shumica e ekipeve të mëdha europiane e kanë pasur lakmi. Borozani.com
I tillë ishte edhe Diego Costa, i cili ditë më parë u transferua në skuadrën londineze Chelsea.
Costa në Atletico ishte transferuar së pari në vitin 2007 nga Sporting Braga për 1.5 milionë euro, mirëpo që nga ajo kohë e deri në vitin 2009 u huazua në skuadra të ndryshme pasi që nuk kishte hapësirë loje në Atletico. Në korrik të vitit 2009 u transferua në Real Valladolid dhe një vit më pas përsëri u rikthye në Atletico.
Në përbërjen e ekipit të parë të Atleticos u inkuadrua në stinorin 2010/11, ndërsa tani Chelsea u dasht të paguaj hiq më pak se 35 milionë euro për t’i siguruar shërbimet e tij.
Megjithëse ky transferim i ka mbushur arkat e klubit, në sulmin e Atleticos tani është krijuar një zbrazëti me largimin e brazilianit me nënshtetësi spanjolle.
Për të gjetur zëvendësimin e Costas drejtuesit e Atleticos janë hedhur në sulm, ndërsa trajneri Diego Simeone, i bindur që do të gjendet një zëvendësim adekuat, e dha shembullin e Falcaos.
“Ashtu sikur Falcaon, do ta zëvendësojmë edhe Costan,” tha Simeone.
Pse Falcao? ...Sepse sulmuesi kolumbian i cili ishte transferuar në Atletico më 11/12 si zëvendësim i Agueros, pas paraqitjeve të shkëlqyera u shit për 60 milionë euro duke e lënë sulmin e Atleticos në ‘lloq’. E pikërisht Diego Costa u bë pasardhësi i Falcaos, që përsëri u shit për para të majme.
Shitja e sulmuesve me çmime astronomike është bërë traditë te Atletico. Falcao për 60 milionë, Aguero për 45 milionë, Torres për 30 milionë... Dhe çka është më e rëndësishmja, skuadra asnjëherë nuk ka mbetur keq pasi që janë shitur këta sulmues.
Tani në Vicente Calderon pritet të vijë një sulmues i ri. Se kush do të jetë sulmuesi i ri ende nuk dihet. Por tanimë diçka është e sigurtë se edhe ky sulmues që do të vie, nëse pas 2-3 viteve do të shitet për një super-çmim, askush nuk do të çuditej.
Sulmuesit e mëparshëm të Atletico Madridit
Sulmuesi | Periudha për sa qëndroi në Atletico | Ekipi nga erdhi | Ekipi ku u transferua |
Fernando Torres | 2001-2007 | Erdhi nga akademia e Atleticos | Në Liverpool - 30 milionë euro |
Sergio Aguero | 2006-2011 | Nga Independiente - 21.7 milionë euro | Në Manchester City - 45 milionë euro |
Diego Forlan | 2007-2011 | Nga Villarreal - 21 milionë euro | Në Inter - 5 milionë euro |
Radamel Falcao | 2011-2013 | Nga Porto - 47 milionë euro | Në Monaco - 60 milionë euro |
Diego Costa | 2010-2014 | Nga Real Valladolid - 1 milion euro | Në Chelsea - 38 milionë euro |