Në radar të Mourinhos

E përditshmja angleze Daily Mirror ka dalë sot me njoftimin se sulmuesi kolumbian i Monacos, Radamel Falcao, mund të bëhet lojtar i Chelseat në janar të vitit që vjen. 

I tërë ky muhabet rrjedh pasi që Falcao vazhdon të shënojë gola me ekipin e tij në Francë, mirëpo, mosprania e Monacos në gara europiane po e lë kolumbianin pa sfida të mjaftueshme. 

E kjo ka bërë që trajneri i Chelseat, Jose Mourinho, të monitorojë edhe më afërsisht gjendjen e sulmuesit kolumbian, për të cilin dëshiron që të thejë rekordin britanik të transferit. 

E vetmja pyetje qëndron në faktin se a do të jetë i gatshëm pronari i londinezëve, Roman Abramovich, t’i paguajë aq para për një transfer të janarit. 

Chelsea në gjirin e saj ka sulmues si Fernando Torres, Samuel Eto’o, Andre Schurrle dhe Demba Ba, mirëpo të gjithë këta në total kanë shënuar katër gola në Premier League për londinezët pas 11 xhirove ku Chelsea ka shënuar 18 gola.