Ozil me kontratë dhe numër të ri te Arsenal

Puna cilësore shpërblehet nga Arsene Wenger dhe Arsenal. Këtë së shpejti në lëkurën e tij pritet ta përjetojë mesfushori gjerman i Arsenalit, Mesut Ozil, ka raportuar Sport Bild sot.

Ozil, që erdhi nga Real Madridi te Arsenal në verën e vitit 2013 për shumën e 42.5 milionë funtave, pritet të përfitojë kontratë të re dhe të bëhet lojtari më i paguar i ekipit londinez.

Gjermani 27 vjeç raportohet të përfitojë tash e tutje 200 mijë funta rrogë javore nga Arsenali, e ndër të tjera do të merr edhe numrin 10 në fanellë nga stinori i ardhshëm.

Dhjetëshja aktualisht i takon Jack Wilsherit, i cili është huazuar te Bournemouth dhe te Arsenal nuk e përdor askush. Ozil mban numrin 11.

Stinori 2016/17 është stinori i katërt i Ozilit te Arsenali. Ai ka regjistruar 85 paraqitje në Premier Ligë dhe këtë stinor pritet që të bëj jubilaren, të 100-tën. Stinorin e kaluar, kur Arsenali përfundoi si nënkampion i Anglisë, ai ka shënuar 6 gola, ndërsa specialitet i tij është organizimi i ndeshjes dhe asistimet.

Mesfushori në fjalë është i rregullt dhe i padiskutueshëm edhe në përfaqësuesen gjermane.