Pas 6 vitesh i kthehen Premier Ligës

Middlesbrough dhe Brighton luajtën kundër njëri-tjetrit sot në javën e fundit të sezonit në Championship. Ajo çfarë e bëri të veçantë këtë përballje ishte se të dy klubet kishin 88 pikë para ndeshjes dhe pozicionoheshin përkatësisht në vend të dytë dhe të tretë.

Brighton kishte mundësinë që me një fitore t’ia rrëmbente kundërshtarit vendin e dytë, vend që të çon automatikisht në Premier League.

Stuani gjeti shumë shpejt golin për vendasit në minutën e 19-të pas një skeme nga një goditje dënimi, por Stephens arriti të barazojë rezultatin për Brightonin në pjesën e dytë me një gol kokë pas një goditjeje dënimi.

Megjithatë Stephens pak minuta më vonë u ndëshkua me të kuq pas një ndërhyrjeje brutale ndaj Ramirezit, që u detyrua të zëvendësohej. Brighton me 10 lojtarë nuk arriti ta ndryshonte rezultatin.

Kjo do të thotë se, pas 6 vitesh në Championship, Middlesbrough siguron matematikisht kualifikim direkt në Premier League. Brighton nuk i tha lamtumirë shanseve për t’u ngjitur në elitën e futbollit anglez. Ata do të duhet ta vazhdojnë rrugëtimin nëpërmjet Play-Offit.