Pikë e artë për Dritën në Drenas

Skuadra e Dritës është kthyer me një pikë shumë të rëndësishme në shtëpi, pas duelit të vështirë në Drenas ndaj Feronikelit.

Ndeshja që u zhvillua në stadiumin “Rexhep Rexhepi”, përfundoi me rezultat të barabartë pa gola, duke i dhënë kështu një goditje të rëndë skuadrës së Afrim Tovërlanit në luftë për titull.

Në pjesën e parë të ndeshjes Feronikeli kishte më shumë posedimin e topit, por që mysafirët treguan lojë të vëmendshme dhe organizim të mirë në mbrojtje, duke mos lënë mundësi që të ndryshohet rezultati.

Trajneri Afrim Tovërlani bëri dy zëvendësime në fillim të pjesës së dytë, me shpresë për ta gjetur golin, duke e futur Labinot Osmanin dhe Blerand Kurtishajn në vend të Abu Razard dhe Yll Hoxhës.

Mirëpo planet e Tovërlanit u prishën në minutën 68’, kur Mendurim Hoti u përjashtua nga loja pas kartonit të dytë të verdhë, ndërsa Drita për pak sa nuk shënoi me Dren Gashin, goditja e të cilit u ndal në shtyllën e portës së Faton Malokut.

Në 10 minutat e fundit të kohës së rregullt, Feronikeli i shpeshtoi rastet duke kërkuar golin e fitores me anë të Zhdrellës e Maliqit, por asnjëri nga ta nuk arritën të shënojnë.

TABELA AKTUALE

Ky rezultat i konvenoi më shumë Dritës, e cila fitoi një pikë shumë të rëndësishme nga një ndeshje e vështirë siç është kjo ndaj Feronikelit, ndërsa këtij të fundit i mbetet të shpresojë që rivali kryesor për titull, Trepça ‘89, të gabojë nesër në ndeshjen kundër Ferizajit.