Prishet seria e Interit, Lazio në gjysmëfinale

Pas 9 fitoreve radhazi në të gjitha garat, Interi i Piolit është mposhtur nga Lazio në çerekfinale të Coppa Italia, për t’u eliminuar kështu nga kjo garë.

Interi e gjeti veten në disavantazh pas golit të brazilianit Anderson në minutën e 20’, ndërsa gjërat u komplikuan pas kartonit të kuq të Mirandas, i cili shkaktoi penallti, nga e cila i saktë u tregua Lucas Biglia dhe epërsia e mysafirëve u dyfishua. Më pas, me karton të kuq u ndëshkua edhe Lazio, mirëpo e tëra çfarë Interi mund të bënte ishte ngushtimi i epërsisë, kurse barazimi nuk erdhi në asnjë moment dhe eliminimi ishte i paevitueshëm.

Në gjysmëfinalen e parë do të takohen Juventusi me Napolin, derisa në gjysmëfinalen tjetër Lazio e pret fituesin mes Romës e Cesenës, takim i cili zhvillohet nesër dhe me shumë gjasa gjysmëfinalja e Kupës do të na sjell derbin e Romës.