Prishtina e Re rimerr kreun sot me përmbysje ndaj Vllaznisë

Nuk ka qenë fare lehtë përkundër dominimit në posedim për Prishtinën e Re ndeshja e sotme ndaj Vllaznisë që po lufton për mbijetesë. Dy ekipet që po luftojnë për ekstreme të kundërta në Grupin B të Ligës së Parë, kanë zhvilluar një përballje interesante, ndërsa në fund, u gëzuan vendasit që kërkuan gjatë gjithë ndeshjes fitoren.

Por, loja nisi ndryshe sa i përket rezultatit. Mysafirët morrën epërsinë pas një korneri, kur Vllaznia shënoi për 0-1! Kjo bëri që Prishtina e Re e drejtuar nga Elon Berisha të kërkojë edhe më shumë golin, por rastet nuk shndërroheshin në gol, derisa pak para fundit të pjesës së parë Kreshnik Bahtiri realizoi bukur për barazim!

TABELA AKTUALE

E në pjesë të dytë, ka qenë dominim i plotë i vendasve por për golin e fitores ekipi i Prishtinës së Re u desht të “vuajë” deri kah minutat e fundit, kur në të 80-tën shënoi Dobratiqi për fitore. Prishtina e Re - Vllaznia 2-1 [Kreshnik Bahtiri 42’, Lorik Dobratiqi 80’ - n.n. 33’].

Prishtina e Re kështu merr kryesimin e Grupit B të Ligës së parë, së paku sot, me 43 pikë nga 19 ndeshje dhe pret gabimin e Ferizajit në formë për të mbetur në krye. Vllaznia e parafundit (e nënta) ka 14 pikë nga 19 ndeshje dhe shpreson që të mos bie në fund të renditjes me përfundimin e xhiros.