PSG-CHELSEA

REUTERS

Problemi, te përvoja

2 April, 2014 @13:59

Skuadra me pronarë nga Lindja e Mesme, Paris St Germain, është duke kërkuar që të bëj atë që do të mund të quhet befasi.

Përkundër mungesës së përvojës në këto faza të Ligës së Kampionëve, trajneri françez i ekipit parisien, Laurent Blanc, beson se ekipi i tij ka forcë që t’i vihet përballë Chelseat të fortë dhe stabil - për të kaluar në gjysmëfinale.

“Edhe pse në kampionatin vendor gjithçka po na shkon mirë, në Europë jemi ndër skuadrat e mbetura me më së paku përvojë të kësaj faze. Chelsea e Parisi kanë stile të ndryshme loje. Ata e duan më shumë kundërsulmin, kurse ne posedimin e topit. Cila do të jetë më efektive do të shohim pas dy përballjeve,” ka qenë i qartë Blanc i cili beson në fuqinë e ekipit të tij.

Trajneri i Chelseat në anën tjetër, Jose Mourinho, ka thurrur lëvdata për sulmuesin suedez të parisienëve, Zlatan Ibrahimovic, që po bën kërdi me ekipin e tij duke shënuar gola.

“Ata kanë lojtarë që bëjnë dallimin. Kjo është me rëndësi të madhe në këto ndeshje. Nëse Lionel Messi, Zlatan Ibrahimovic, Robert Lewandowski, Diego Costa, Edinson Cavani e Ezequiel Lavezzi janë ndër sulmuesit më të mirë në botë sot, shikoni sa prej tyre luajnë për Paris St Germain. Gjithashtu edhe Blanc, ka filozofi të qartë loje. Përvoja është në anën tonë, së paku për dhjetë vitet e fundit. Mirëpo, shumica e lojtarëve të mi janë pa përvojë në këtë garë,” ka qenë i matur portugezi që din të jetë tepër kontravers, Jose Mourinho në konferencën për shtyp para ndeshjes së sotme.

Sa i përket këtyre dy skuadrave, është interesante të ceket fakti që Jose Mourinho ka debutuar në Ligë të Kampionëve me Chelsean në vitin 2004 në ndeshje ndaj Paris St Germain, ku kishte fituar në Parc des Princes me golat e John Terry dhe Didier Drogba (2).