Rebelit Payet i vihet çmimi

Mesfushori francez, Dimitri Payet, që ka shkëlqyer gjatë vitit të kaluar si në ekipin e West Ham Unitedit, ashtu edhe në reprezentacion të Francës, kryesisht gjatë Kampionatit Europian “Franca 2016” - ka kërkuar të largohet nga ekipi i “çekanëve”.

Këtë e ka bërë të ditur edhe trajneri kroat i ekipit londinez, Slaven Bilic, dje. Mediat britanike kanë transmetuar fjalët e kroatit duke thënë se Payet nuk dëshiron të qëndrojë në West Ham United, edhepse ekipi do të bëj gjithçka që ai të qëndrojë aty.

Sot, mediat britanike njoftojnë se si duket West Ham United është dorëzuar në insistimin e tij dhe i ka vënë çmimin prej 40 milionë funtave Payetit. Pra, kushdo që e kërkon atë, duhet të paguajë të hollat e cekura në arkë të West Ham Unitedit.

Çekanët e Londrës deri tash kanë refuzuar një ofertë të ardhur nga Olympiqe Marseille prej 20 milionë funtave, ndërsa i kanë ofruar Payetit 125 mijë funta rrogë javore për një kontratë të gjatë deri në qershor të vitit 2021.