Rikthehet me emocione në Bari

Sulmuesi korpulent i kombëtares shqiptare, Edgar Çani, është rikthyer në Bari të Italisë. Por kësaj radhe jo si refugjat, por si futbollist sulmues për ta shpëtuar ekipin e famshëm italian nga rënia në Serie C. 

Çani është përlotur në konferencën për shtyp kur u prezentua te ekipi i tij i ri duke kujtuar ditët e tij të para në Itali, derisa mediat italiane kanë pyetur lidhmërinë e tij emocionale me qytetin. 

“Kam qenë 11 muajsh kur kam zbarkuar në Bari nga anija me mbi 20 mijë persona në bord. Mami gjithmonë më ka lëvduar mikpritjen dhe solidaritetin unik të barezëve. Me t’u rritur unë ia nisa futbollit këtu, në Umbria,” ka përkujtuar në lot Çani, transmetojnë mediat italiane fjalët e shqiptarit. 

“Shpresoj të shlyejë borxhin ndaj këtij qyteti duke shënuar gola. Ky qytet i ka dhënë dorën familjes sime në momentin më kritik. Unë jam pagëzuar në Bari, por asnjëherë nuk kam mësuar cilët kanë qenë kumbarët e mi. Shpresoj t’i gjej,” ka përfunduar 24 vjeçari prezentimin e tij në klubin e ri. 

Çani së fundi ka luajtur pa ndonjë sukses të madh te Carpi, gjithashtu në Serie B. Ai është zgjedhja e parë e sulmit të kombëtares shqiptare, mirëpo për shkak të mungesës së lojërave të rregullta, në disa raste është lënë jashtë e nuk është thirrur nga Gianni De Biasi. 

Bari është në zonë të rrezikshme të Serie B, në pozitën e 18-të me 23 pikë, derisa Reggina e fundit në tabelë ka 20 pikë.