ZYRTARE
Rodriguez zyrtarisht i Realit
22 July, 2014 @14:17
Ylli që shëndriti në Kampionatin Botëror me përfaqësuesen e Kolumbisë, James Rodriguez, iu bashkua zyrtarisht kampionit europian, Real Madrid.
Gjiganti madrilen ka njoftuar nëpërmjet faqes zyrtare se është kompletuar transferimi i James Rodriguezit nga Monaco-ja në Real Madrid për 88 milionë euro, ndërsa futbollisti kolumbian ka nënshkruar kontratë 6 vjeçare me klubin nga Bernabeu.
Mesfushori 23 vjeçar e kishte përfunduar Botërorin si golashënuesi më i mirë me 6 gola të realizuara, ndërsa së fundi goli i tij kundër Uruguajit u shpall goli më i mirë i këtij kampionati.
Transferimi i Rodriguezit u bë transferimi i tretë më i shtrenjtë në historinë e Real Madridit pas Gareth Bale-it dhe Cristiano Ronaldos.
