REAL MADRID - LAS PALMAS
Ronaldo qesh i fundit!
1 March, 2017 @23:19
Një super ndeshje u zhvillua sonte në “Santiago Bernabeu”, ku u përballën skuadrat Real Madrid dhe Las Palmas.
Gola, penallti, karton të kuq dhe dramë. Ndeshja përfshiu gjithçka, por dështoi që ta përcaktojë fituesin.
Këtë nuk e lejoi ylli portugez, Cristiano Ronaldo, i cili me dy ekspres-gola në fund, e shpëtoi Real Madridin ne humbja.
Ndeshja në fakt filloi mirë për madrilenët, të cilët kaluan në epërsi nga minuta e tetë me golin e Iscos.
Kundërpërgjigja erdhi shpejtë nga mysafirët, të cilët vetëm dy minuta më pas shënuan me anë të mesfushorit Tana.
Në pjesën e dytë gjithçka shkoi keq për Realin, pasi Gareth Bale u ndëshkua me karton të kuq, që ishte i pari për të me fanellën e Realit, derisa më pas Sergio Ramos shkaktoi penallti duke luajtur me dorë, të cilën e shndërroi në gol Jonathan Viera.
Tre minuta më vonë erdhi edhe goli i tretë për Las Palmasin kur Kevin Prince Boateng e la në heshtje të pranishmit në stadium për rezultatin 1-3.
Kur pritej që mbretërit do të ndahen kokëulur nga fusha, në skenë doli Cristiano Ronaldo, i cili së pari shënoi nga penalltia në minutën 86’, ndërsa 3 minuta më vonë e barazoi rezultatin në 3-3, që ishte edhe rezultati përfundimtar i ndeshjes.
