DALEY BLIND
Rrezikon stinorin!
20 November, 2014 @23:22
Manchester United përkundër transfereve të shumta është në krizë të rezultateve që priten nga një ekip si ky, derisa për t’i shtuar telashet, janë edhe lëndimet me të cilat po përballen lojtarët.
Kështu, Manchester United ka raportuar se Daley Blind mund të mungojë deri në gjashtë muaj, që domethënë deri kah fundi i këtij stinori, për shkak të lëndimit.
Mirëpo, trajneri holandez i ekipit të Old Trafford, Louis Van Gaal, nuk mendon kështu.
“Nuk është edhe aq keq sa po mendojnë mjekët. Ai e ka të lënduar gjurin dhe do t’i duhen 10 ditë pushim, derisa skenimi i këmbës pas pushimit, do të tregojë më shumë për lëndimin e tij,” ka thënë Van Gaal.
Blind 24 vjeç, është lënduar duke zhvilluar ndeshjen për përfaqësuesen e Holandës ndaj Letonisë, të shtunën që shkoi, derisa Manchester United kishte paguar 14 milionë funta për transferimin e tij nga Ajaxi verën që shkoi.
Përveç tij, Manchester United ka të lënduar edhe dy transferet tjera të këtij stinori, Angel Di Maria dhe Luke Shaw, për të cilët nuk është e sigurtë nëse do të jenë të gatshëm për ndeshjen derbi të fundjavës ndaj Arsenalit në Emirates.
