Salah kalon te Chelsea

I quajtur si ‘Messi i Egjiptit’, Mohamed Salah, pritet që në ditët në vijim t’i bashkohet radhëve të Chelseat. Ekipi i kaltër nga Londra ka bërë të ditur në rrjetin shoqëror Tweeter marrëveshjen e arritur me Baselin. 

Salah 21 vjeçar i cili iu bashkangjit radhëve të Baselit për të zëvendësuar kosovarin Xherdan Shaqiri që shkoi në Bayern München, ka shkëlqyer stinorin e kaluar për kampionin zviceran duke shënuar gola të rëndësishëm për ekipin e tij, ndaj Chelseat, Tottenhamit dhe skuadrave tjera në garat europiane. 

Reprezentuesi i cili ka kaluar nëpër të gjitha grupmoshat e përfaqësueses egjiptiane, bëri emër edhe në Lojërat Olimpike Londra 2012, ku shënoi tre gola në katër ndeshje. 

Ai pritet që të kryejë testet mjekësore dhe të merr lejen e punës në Angli, para se të nënshkruajë kontratë me Chelsean. Salah do të plotësojë mungesën në pozicione të të larguarve, Kevin de Bruyne dhe Juan Mata.