DRITA-BESA
Shillova ndriçon Dritën
17 September, 2015 @18:01
Të gjitha rastet dhe shtyllat e kësaj ndeshjeje do të harrohen shpejtë, derisa një gol i vetëm i shënuar pak para fundit të takimit do të mbahet mend si goli që i solli gjilanasve fitoren e dytë të stinorit.
Drita ka mposhtur Besën në ndeshjen e fundit të xhiros së mesjavës në Superligë, për t’ia dhënë tre pikëshin e dytë ekipit të Bekim Isufit.
Alban Shillova (83’) qëlloi portën e Besës, pasi që topi më parë u dëbua nga shtylla për t’i dhënë Dritës golin e shumëkërkuar. Rastet e panumërta të Besës shkuan më kot, Fatih Karahoda me volej gjuan pranë portës. Mark Milicaj në dy-tre raste tregohet i ngathët, derisa gjilanasit i shpëton edhe gardiani i madh i tyre në portë, Artan Latifi.
Pjesa e parë e ndeshjes kaloi me shumë raste sikurse e dyta. Shtyllë në njërën, e shtyllë në anën tjetër, por goli assesi nuk erdhi. U dalluan me raste të mira Kastritot Rexha te Besa, derisa te vendasit edhe njëherë lojë të mirë tregoi sulmuesi i ri i skuadrës, Fillim Guraziu.
Në xhiron e radhës Besa pret Lirinë në Pejë, derisa Drita udhëton në Vushtrri për tu përballë me ish kampionin.
