Shkelzen Gashi i bashkohet kampionëve

Skuadra e Grasshopperit ka mbetur pa lojtarin e saj kryesor. Ylli kosovar, Shkelzen Gashi, është larguar nga kjo skuadër për t’iu bashkuar kampionit aktual të Zvicrës, Basel.

Lajmi i transferimit të Gashit nga Grasshopperi në Basel është quajtur bombastike nga mediat zvicerane, duke pasur parasysh rivalitetin e drejtpërdrejtë ndërmjet këtyre dy skuadrave, e sidomos në stinorin e fundit ku të dyja skuadrat ishin në luftë për titull deri në javët e fundit të kampionatit.

Në njoftimin e klubit të Baselit, thuhet se me Gashin është arritur marrëveshje për kontratë katër vjeçare, e cila do të nënshkruhet pas përfundimit të testeve mjekësore.

Reprezentuesi i kombëtares shqiptare ishte bërë golashënuesi më i mirë në Superligën e Zvicrës në stinorin e kaluar duke realizuar 19 gola me fanellën e Grasshopperit.