Torres, nga zero në hero

Chelsea ka arritur të fitojë derbin në Stamford Bridge ndaj Manchester Cityt me rezultat 2-1. Sulmuesi spanjoll, Fernando Torres, ka qenë figura kryesore e londinezëve, i cili nga zero është bërë hero i ndeshjes. 

Ai ka dështuar të shënojë një rast të qindpërqindtë në mes të pjesës së parë, duke e çuar topin mbi rrjetë nga pesëmetërshi. 

Por, transferi më i shtrenjtë në histori të Premier League, shumë shpejtë ka asistuar për Andre Schurrlen, i cili ka shënuar golin e parë në ndeshje. 

Mirëpo, vetëm tre minuta pas fillimit të pjesës së dytë, Sergio Aguero në formë ka barazuar rezultatin duke treguar një vrapim milimetërsh, para se të shënojë në shtyllën e afërme ku qëndronte Petr Cech. 

Javi Garcia dhe David Silva dështuan dy raste të mira për të dërguar Manchester Cityn në epërsi, derisa krejt në fund Joe Hart u zu i vetmuar, pasi që Fernando Torres përfitoi një pasim të gabuar rëndë nga Matija Nastasic për të shënuar golin e fitores dhe për të përcaktuar fituesin e derbit të kësaj xhiroje.