TREPÇA - LLAPI
Llapi duke festuar sot/ Foto: KFLlapi Official/ M. M.
Trepça dominon, Llapi fiton
5 April, 2017 @16:54
Përkundër dominimit të Trepçës, ishte skuadra e Llapit ajo që festoi sot në ‘Adem Jashari’ të Mitrovicës. Llapjanët shfrytëzuan shumë mirë rastet që i patën, duke shënuar 3 herë dhe duke ia komplikuar edhe më tepër punët e Trepçës në luftë për mbijetesë.
Të parët në epërsi kaluan mysafirët pas një penalltie të fituar nga Mirlind Daku, i cili u rrëzua në zonë nga Kutllovci i vendasve dhe gjyqtari akordoi penallti për mysafirët. Nga pika e bardhë i saktë u tregua Festim Krasniqi dhe Llapi e morri epërsinë. Më pas, Trepça e morri në kontroll lojën, derisa goli i barazimit u shënua nga Enis Zabërgja në minutën e 30’ të takimit. Zabërgja golin e gjeti me një goditje tejet të saktë nga afro 20 metra.
Si në pjesën e parë, edhe në pjesën e dytë Trepça u tregua skuadër më e mirë, duke rrezikuar më tepër dhe duke pasur më shumë posedim, mirëpo kjo nuk përkoi me rezultatin përfundimtar të takimit. Ishte rezervisti Filonit Shaqiri ai që i dha epërsinë skuadrës së Tahir Batatinës. I shërbyer nga Zeqiri, Shaqiri nuk gaboi para portës dhe shënoi për 1-2.
Një minutë pas golit, gjërat u komplikuan edhe më tepër për Trepçën. Pas një zënke mes futbollistëve, me karton të kuq u përjashtua Florent Avdyli i vendasve, duke bërë që Llapi ta kishte edhe më të lehtë arritjen e fitores.
5 minuta pas kartonit të kuq, Llapi e gjeti edhe golin e tretë, me Mirlind Dakun që shënoi për rezultatin përfundimtar 1-3.
Kjo humbje ia komplikon shumë punët Trepçës në luftën për mbijetesë, derisa Llapi ndodhet në vendin e katërt.
