Tuchel: S’jemi City e Bayern, por i kemi 90-minuta futboll

Trajneri gjerman i Chelseat, Thomas Tuchel, ka thënë se përkundër që ekipi i tij nuk është në nivel të Manchester Cityt e Bayernit, futbolli si sport magjik - e mundëson këtë.

Tuchel, që ka qenë në finale të Ligës së Kampionëve edhe vjet, me ekipin e tij të kaluar, Paris St Germain, do të jetë trajner i rrallë me këtë arritje - dy ekipe të ndryshme, dy finale të Ligës së Kampionëve radhazi!

Ndërsa para duelit final ndaj Manchester Cityt, ai është shprehur se magjia e futbollit në 90-minuta mund të jep zgjidhje për gjithçka.

“Si fëmijë, ëndërroni për këto ndeshje. Dhe këto duken shumë larg, sikur kur e shikoni hënën. Por, në momentin që je aty, ti je aty. Nuk hezitoj të them se ne s’jemi cilësi e lojës së Manchester Cityt sivjet dhe Bayernit vjet veçanërisht në gara evropiane. Por, ne po mundohemi të mbulojmë nivelin dhe më e mira e futbollit është kjo, brenda 90-minutave do të mund t’i mposhtim dhe të bëhemi më të mirët,” ka thënë Tuchel.

Gjermani në sezonin e kaluar pësoi nga Bayerni në finale, derisa ishte duke e drejtuar Paris St Germainin. Sonte, do të ketë mundësinë që ta fitojë trofeun më të madh evropian.