Vëllaznimi rikthen Lorik Rudin, priten edhe transfere të tjera

Si sezonin e kaluar, edhe këtë sezon që po vjen Vëllaznimi pritet të jetë skuadër e organizuar mirë në Ligën e Parë.

Gjakovarët përveç që kanë vazhduar kontratën me trajnerin Ardian Mema dhe kanë emëruar ish-futbollistin Yll Myrta ndihmëstrajner, kanë mbajtur në skuadër lojtarët kryesorë, ndërkohë veçse kanë filluar t’i prezantojnë përforcimet e afatit kalimtar veror.

Nikson Memaj, Norik Krasniqi, Gentrit Dumani, Rron Rogova, Art Maloku, Ardit Vokshi, Lek Pozhegu, Qemail Elshani, Besfort Dervishaj, Altin Vojvoda, Benjamin Ukaj, Albutrint Morina, Getuard Kabashi e Gentrit Bislimi kanë mbetur në skuadër nga sezoni e kaluar, duke u ruajtur kështu pjesa kryesore e skuadrës startuese.

Emri i parë i sjellur te gjakovarët është Lorik Rudi, i cili rikthehet në shtëpinë e tij pas disa viteve të kaluara në skuadra të ndryshme si Phoenix, A&N, Liria, Feronikeli e së fundi Rahoveci.

Rudi, që luan si mesfushor i krahut por edhe mbrojtës i krahut, te Vëllaznimi rikthehet pas rreth 4 viteve.

Ndërkohë, burime të TopSportit kanë mësuar që gjakovarët ditëve të ardhshme do të prezantojnë edhe përforcime të tjera, me qëllim rikthimin në Superligë pas shumë viteve mungesë.