ARSYETIMI
Welbeck nuk ka shënuar mjaft gola
11 September, 2014 @20:42
Danny Welbeck ishte transferuar nga Manchester Unitedi në Arsenal në ditën e fundit të afatit kalimtar për 16 milionë funta.
Realizatori i dy golave të përfaqësueses së Anglisë në ndeshjen kundër Zvicrës në fundjavë, është vlerësuar si i tepërt te ‘djajtë e kuq’ nga trajneri holandez, Louis Van Gaal.
Në konferencën e sotme për shtyp, Van Gaal, ka treguar arsyet e vendimit të tij për ta larguar sulmuesin 23 vjeçar nga skuadra.
“Unë i kam dhënë rast të gjithë lojtarëve që të më bindin mua me cilësitë e tyre. Danny Welbeck ka qenë këtu që nga mosha 9 vjeçare. Pasi që është kthyer nga Sunderlandi (ku ka qenë i huazuar) ai ka luajtur tre stinorë me Manchester Unitedin, por ai nuk ka arritur të shënoj sa Van Persie dhe Rooney, dhe ky është kriteri.”
“Kjo është arsyeja se përse ne e lejuam atë të largohet, sidomos pas ardhjes së Falcaos, si dhe krijimit të hapësirës për lojtarët e rinj,” tha Van Gaal.
Welbeck në gjithsej 142 paraqitje me Manchester Unitedin ka realizuar 29 gola dhe 21 asistime.
