Zyrtarizohet Seedorf

Holandezi Clarence Seedorf, është trajner i ri i Milanit edhe zyrtarisht. 

“Nuk mund ti thoja jo një njeriu me të cilin kam marrëdhënie të mira, me të cilin kam bashkëpunuar më se dhjetë vite,” ka thënë Seedorf transmetojnë mediat e huaja. 

Pas shkarkimit të Massimiliano Allegrit nga detyra e trajnerit të Milanit, Seedorf dhe Filippo Inzaghi janë përfolur si trajner të mundshëm dhe holandezi ka fituar betejën. 

Ai nuk ka përvojë të trajnerit, mirëpo me gjithë qejf po e pranon detyrën e tij të re, ashtu siç raportoi edhe sot gjatë ditës Gazzetta dello Sport, duke nënshkruar kontratë deri në qershor të vitit 2016. 

Ndihmës të Seedorfit pritet të jenë ish dyshja e Milanit, Hernan Crespo dhe Jaap Stam. 

Me pranimin e detyrës së tij të re si trajner i Milanit, Seedorf ka lajmëruar njëkohësisht edhe lënien e futbollit aktiv, duke u pensionuar si lojtar i Botafogos, ku luan që nga viti 2012.