10 transferet më të këqija të stinorit në Premier League

Si çdo stinor edhe sivjet ka pasur trensferime të mëdha në Premier League, të cilët janë realizuar duke pasur pritje të mëdha nga ekipet që i kanë kryer ato transferime. Megjithëse janë shpenzuar para të majme për transferimet e lojtarëve, ndonjëherë këto transferime nuk kanë dalë të qëlluara.

E përditshmja angleze, The Telegraph, duke u bazuar në këtë fakt, ka përcaktuar 10 transferimet më të këqija për sivjet në Premier League. Ja cilët janë këto transfere…

10. Martin Demichelis (Manchester City)

Ish futbollisti shumëvjeçar i Bayern Munchenit u transferua në Manchester City për 5 milionë euro nga Atletico Madrid. Me kampionin aktual të Premier Leagues, ka pasur gjithsej 25 paraqitje në Premier League, mirëpo për shkak se shumica e gabimeve që i bënte përfundonin me gol, e shndërruan atë një transferim të dështuar për këtë stinor.

9. Tiago Ilori (Liverpool)

Qendërmbrojtësi 21 vjeçar u transferua për 8.25 milionë euro nga Sporting Lisbona në Liverpool. Ilori nuk pati asnjë paraqitje me ekipin e parë të Liverpoolit kurse ndeshjet e vetme që i zhvilloi me të kuqtë, ishin me skuadrën e të rinjëve U21. Në janar u huazua La Liga te skuadra e Granadas.

8. Nicolas Anelka (West Bromwich Albion)

Anelka u transferua në West Bromwich Albion pa dëmshpërblim. Megjithëse nuk u shpenzua asnjë cent për dëmshpërblimin e tij, nuk mund të thuhet se Anelka nuk i ka kushtuar aspak WBA-së. Ai përveç se kishte paraqitje zhgënjyese në fillim të stinorit, e futi veten në telashe për shkak të përshëndetjes naziste pasi shënoi gol në ndeshjen kundër West Hamit. Kjo ishte edhe ndeshja e vetme e Anelkas që shënoi me fanellën e West Bromwichit. Ish reprezentuesi i Francës, tani ka deklaruar se është pensionuar nga futbolli.

7. Mesut Ozil (Arsenal)

Skuadra e Arsenalit, e cila njihej si një skuadër që shpenzon fare pak për transferime, e theu këtë tabu duke e transferuar Mesut Ozilin nga Real Madridi për hiq më pak se 50 milionë euro. Megjithëse në fillim të stinorit kishte paraqitje të jashtëzakonshme, në përgjithësi performanca e tij ishte shumë më e ulëta në krahasim me pritjet që ishin kur u transferua. Ai në fillim krahasohej me Eric Cantonan, duke u emërtuar si Cantona i Arsenalit, ndërsa tani më shumë po krahasohet me Dimitar Berbatovin.

6. Jozy Altidore (Sunderland)

Sulmuesi amerikan vlerësohej si një makinë e golave kur u transferua në Sunderland nga AZ Alkmaar, pasi gjatë stinorit 2012/13 kishte shënuar 23 gola me fanellën e AZ Alkmaarit. Por këtë stinor Altidore arriti të shënoj vetëm një gol në 1746 minuta sa mbeti në fushë në ndeshjet e Premier Leagues. Sulmuesi i cili kushtoi 10 milionë euro, po përjeton stinorin më të keq në karrierën e tij.

5. Dani Osvaldo (Southampton)

Skuadra e Southamptonit ka paguar dëmshpërblimin e dytë më të shtrenjtë në histori të klubit, duke shpenzuar 15.1 milionë euro për transferimin e Pablo Osvaldos nga Roma. Mesfushori 28 vjeçar ishte dënuar për dy javë nga klubi për shkak se e kishte goditur me kokë bashkëlojtarin e tij dhe më pas u huazua në Juventus gjatë afatit kalimtar të janarit.

4. Roberto Soldado (Tottenham Hotspur)

U transferua në Tottenham nga Valencia për 30 milionë euro. Në fillim u tregua si një përforcim mjaft i qëlluar duke shënuar katër gola në tre ndeshje, por tani është shndërruar në një sulmues që nuk arrin dot ta gjejë rrugën e golit. Nga 26 paraqitjet në Premier League, Soldado ka shënuar gjithsej 6 gola, ku katër prej tyre i ka realizuar nga penalltitë.

3. Andreas Cornelius (Cardiff City)

Kur sulmuesit transferohen për para të majme dhe më pas tregojnë paraqitje dëshpëruse, gazetarët zakonisht llogarisin se sa i ka kushtuar klubit çdo gol i shënuar nga ai sulmues. Mirëpo kjo llogaritje nuk mund të vlej edhe për Andreas Corneliusin, i cili u transferua për 8.7 milionë euro në Cardiff City nga FC Copenhagen, pasi që sulmuesi danez nuk arriti të shënoj asnjë gol me fanellën e Cardiffit në 11 paraqitje sa i kishte. Si rrjedhojë e këtij dështimi, Cornelius u kthye në Copenhagen gjatë afatit kalimtar të janarit.

2. Erik Lamela (Tottenham Hotspur)

Kur u transferua në Tottenham Hotspur, e mbante epitetin si njëri prej talentëve më të mëdhenj në botë. Tottenhami shpenzoi 30 milionë euro për transferimin e tij nga Roma, duke menduar se ai do të jetë zëvendësimi ideal për Gareth Bale-in, i cili largua për një çmim rekord te Real Madridi. Por futbollisti në fjalë pati shumë vështirësi të adaptohej në lojën me ekipin e tij të ri. Gjatë stinorit vjeshtor Lamela pati vetëm 3 paraqitje si titullar, ndërsa më shumë llogaritej në ndeshjet e Europa League. Përveç kësaj, mesfushori ofansiv ende nuk ka ndonjë paraqitje gjatë vitit 2014 për shkak të lëndimit në shpinë.

1. Mourouane Fellaini (Manchester United)

Mesfushori belg u transferua nga Evertoni në Manchester United për hiq më pak se 32.4 milionë euro në fillim të këtij stinori. Ai ishte parashikuar se do të jetë lider i mesfushës te djajtë e kuq, mirëpo 26 vjeçari nuk arriti t’i tregojë cilësitë e tij të vërteta siç jemi mësuar ta shohim në Everton.