12 klube zyrtarizojnë Superligën Evropiane

Janë konfirmuar 12 klubet evropiane që po mëtojnë krijimin e një Superlige Evropiane të futbollit, ku do të garojnë përgjatë mesjavëve, duke respektuar ligat kombëtare.

Në një lëvizje që ka hasur në kundërshtim të ashpër nga secila anë, pos atyre pjesëmarrëse, Arsenal, Chelsea, Liverpool, Man City, Man United, Tottenham, Milan, Inter, Juventus, Atletico, Real Madrid dhe Barcelona — ekipet tashmë kanë zyrtarizuar pjesëmarrjen.

Në ndërkohë, me kaq s’po përfundon asgjë, pasi që edhe tri ekipe tjera pritet t’i bashkohen 12-shes.

“Duke bashkuar ekipet më të mëdha të botës dhe lojtarët më të mirë të botës në një garë përgjatë gjithë sezonit, Superliga do të hap një kapitull të ri në futbollin evropian, duke siguruar një garë të klasit botëror dhe me objekte fantastike e përkrahje më të madhe financiare,” — ka thënë Joel Glazer, bashkëpronar i Manchester Unitedit dhe njeriu që pritet të jetë nën-kryetar i Superligës Evropiane.

UEFA, Premier League, bile edhe kryeministri i Britanisë së Madhe Boris Johnson kanë dënuar ashpër këtë lëvizje dhe kanë folur për masat e rrepta ndaj klubeve pjesëmarrëse këtu.

“Ne do t’i ndihmojmë futbollit në çdo nivel dhe do ta bartim atë në vendin që e meriton në botë,” — ka thënë kryetari i Superligës Evropiane, Florentino Perez, që është njëshi i Real Madridit.

Ndërsa kërcënimi i ashpër ka ardhur nga UEFA-ja, që ka bërë të ditur se jo vetëm nga ligat, por futbollistët e këtyre ekipeve do të mund të mbesin edhe pa të drejtë paraqitjeje te kombëtaret e tyre në garat që i organizon ajo.

“Klubet që do të marrin pjesë në këtë ligë, do të ndalohen të marrin pjesë në ligat e tyre kombëtare, në garat evropiane dhe botërore, ndërsa lojtarëve të tyre do të mund t’iu merret mundësia për të qenë pjesë e reprezentacioneve përkatëse,” — është thënë në komunikatën e UEFA-së.