5 për fundjavë, ndeshjet për të mos u humbur!

1. Sheffield United – Sheffield Wednesday (e premte, ora 15n9)

Derbi i qytetit ku ka lindur organizimi ekipor në futboll, përfshin dy ekipet më të reja të qytetit në krahasim me ekipin e parë futbollistik në botë. Sheffield FC mund të luaj në nivelin e tetë të futbollit anglez dhe t’u kthehet rregullave të tyre të futbollit një herë në vit, por dy ekipe me gjasa për t’u ngjitur në nivelin më të lartë të ligës angleze janë United dhe Wednesday.
Atdhe Nuhiu ka zhvilluar nëntë ndeshje dhe vetëm një gol ka shënuar për Wednesday, të cilët pas sezonit të kaluar kur ishin afër kualifikimit, këtë vit janë fundosur në mesin e tabelës. Ndërkohë United ka befasuar me lojëra të mira vjeshtën e kaluar dhe tani janë në pozitë të mirë për të siguruar Play Off-s, edhe pse vetëm këtë sezon janë inkuadruar në Championship. Herët është për Play Off-s, por atmosfera në derbin e Sheffield kurrë nuk mungon.
Në të njëjtën kohë keni edhe Leverkusenin me Bayernin në hapjen e sezonit pranveror të Bundesligës.

2. Chelsea – Leiceter City (e shtunë, ora 4)

Në ndeshjen e parë të sezonit, Chelsea kishte fituar lehtë me Alvaro Moratan. Spanjolli nuk është në formë të mirë së fundmi dhe ideja për të huazuar Batshuayin duke mbetur vetëm me një sulmues s’do të ishte e përshtatshme për kampionët aktual të Anglisë. Dy barazime me Arsenalin, një me Norwichin nuk janë rezultate aq brengosëse sa huqjet e Moratas në Emirates. Drinkwater ka gjetur hapësirë tek Chelsea, ngjashëm siç është kthyer në formë Albrighton për ekipin e Puel. Në vjeshtë Shakespeare kishte qenë trajner i kampionëve të parafundit. Ndeshje e hapur, që do të duhej të premtonte gola, sepse Chelseat i duhet të fitojë, e Leicester edhe ashtu nuk ka çfarë të kalkulojë.

3. Tottenham – Everton (e shtunë, ora 6e30)

Tridhjetetre milionë euro të hedhura në bërllog kanë qenë verën e kaluar tek Everton. Faturën e ka paguar Koeman, por kam frikë se janë shtuar edhe 22 milionë për Cenk Tosunin. Turku është i shkëlqyeshëm në zonë, mirëpo hapësira në Premier League është e kufizuar për aftësitë e tija. Klaasen e Sandro mund të kenë një shok në verë, nëse e presin verën në Everton.
Kane kishte nisur sezonin e golave në ‘Goodison Park’ ndihmuar nga Eriksen. Pushimi do të duhej të ketë këndellur ‘Spurs’ para një sezoni të rëndësishëm për të ardhmen e kësaj përbërjeje. Katër fitore e një barazim për festa. Vetëm një humbje në Premier League që nga nëntori, është një dëshmi që Evropa ka shpërqendruar më shumë se që ka lodhur Tottenhamin.
Në të njëjtën kohë në Bundesliga është ndeshja ndërmjet Leipzigut dhe Schalkes. Një alternativë interesante.

4. Liverpool – Manchester City (e diel, ora 5)

Evropa mund të ketë një përballje të këtillë në çerekfinalet e Champions League. Dhe me gjasë City mund t’u jap edhe pesë e t’ua bëj më zi se Liverpooli Besiktasit nëse Klopp nuk ndryshon qasje. Mignolet kishte pësuar pesë derisa Mane kishte marrë të kuqin herët në ‘Ettihad Stadium’ herët në vjeshtë. Që nga atëherë Liverpooli është këndellur paksa, e City vetëm po shfaqte seriozitetin, i cili nuk prisnim të kishte kësisoj përmasa të mëdha.
Të dyja ekipet kanë qenë në formë për festa, e Liverpool nuk ka humbur që nga tetori. Do të jetë interesante të shohim si do të përshtaten pa Coutinhon, e mungesa eventuale e Hendersonit do të duhej të ishte pozitive për Reds. Ndërkohë Cityt fitorja i duhet vetëm për të shfaqur dominimin, pasi puna e titullit ka përfunduar moti.

5. Sociedad – Barcelona (e diel, ora 15n9)

Ranieri nuk mund të fitoj ligën e Francës me Nantes. Mirëpo ka trashëguar një ekip të mirë nga Conçeicao. Mund t’i rezistojë PSG-së për një kohë, por jo edhe ta fitojë.
Ngjashëm do të duhej të ndodhte edhe në San Sebastian. Sociedadi është në rënie të lirë së fundmi. Vetëm një fitore në ligë në shtatë xhirot e fundit, me humbje edhe nga Malaga e Lleida në kupë, do të ishte çmenduri të prisnim rezultat pozitiv ndaj Barcelonës, e cila po forcon themelin e një super-ekipi për vitet në vijim. Pjesë e këtij ekipi do të duhej të ishin edhe Mikel Oyarzabal e Kevin Rodrigues. Që të dy bashkëlojtarë të Januzajt janë ndër më të mirë në ekipin bask.
Ndërkohë debutimi i Coutinhos tek Barcelona do të duhej t’i tregonte derën Rakiticit. Kur të rikthehet nga lëndimi, braziliani dhe Dembele do të jetë interesante të shohim si do të pozicionohen të dy nga Valverde në ekip. Trajneri i mysafirëve ka prekur formacionin shumë herë dhe ka dalur i suksesshëm në vendosjen e sulmit dysh nga 4-3-3 i Barcelonës së Laportës.