PYETJA E DITËS
A do të merr Kalinic medalje?
15 July, 2018 @13:34
Futbollisti kroat, Nikola Kalinic, që u përjashtua nga tabori i reprezentacionit të Kroacisë në “Rusia 2018” për shkak të pakënaqësisë me vendimet e trajnerit Zlakto Dalic - do ta shikojë ndeshjen finale nga shtëpia, ku gjendet që prej pas-ndeshjes Kroacia-Nigeria.
Kalinic kishte refuzuar të futej në fushë në 5 minutat e fundit të ndeshjes, kur Kroacia fitonte Nigerinë 2-0 në përballjen e parë të grupit.
Vendimi i HNS-së (Federata e Futbollit të Kroacisë) në bisedë me selektorin Dalic, urdhërat e të cilit nuk i zbatoi Kalinic, ishin të pamëshirshme dhe lojtari u dërgua në shtëpi.
Tash shtrohet pyetja. A do të merr Kalinic medalje (cilëndo që e fiton sot Kroacia në finale të Botërorit)?
Për këtë, përgjigje ka dhënë zëdhënësi i HNS-së, Tomislav Pacak.
“Do të shohim, për këtë gjë vendosin lojtarët dhe trajneri,” ka thënë ai.
Rregullorja e FIFA-së shkruan se çdo ekipi që përfundon në treshen e parë, i takojnë sipas renditjes, nga 50 medalje.
