Afër Manchesterit

Mediat britanike kanë raportuar sot se njëri ndër mbrojtësit më të dalluar të stinorit 2013/14 në Premier League, Luke Shaw, mund të përfundojë te Manchester United. 

Sipas BBC Radio Solent, mbrojtësi i Southamptonit dhe përfaqësueses angleze pritet të nënshkruaj kontratë me Unitedin pasi që të përfundojë testet mjekësore me Djajt e kuq. 

Ekipi nga Old Trafford kishte ofertuar me 27 milionë funta për 18 vjeçarin e krahut të majtë të mbrojtjes në maj, por kjo ishte refuzuar nga ekipi i tij aktual. 

Sidoqoftë, tashmë besohet se Southampton është dakorduar me ofertën dhe është përcaktuar dita kur ai do të duhet të kryejë testet mjekësore në Old Trafford, duke mos bërë të ditur ditën. 

Dje, Manchester United ka konfirmuar nënshkrimin e spanjollit, Ander Herrera, nga Athletic Bilbao për një shumë mbi 30 milionë euro.