Alushi: Një moment vendosi, kolektivisht ndeshja më e mirë

Mesfushori i përfaqësueses së Kosovës, Enis Alushi, në deklaratën e tij pas ndeshjes Kroacia-Kosova, ka thënë se kjo ka qenë paraqitja më e mirë e Kosovës deri tani në kualifikime për “Rusia 2018”.

Njashtu, ai ka komentuar edhe golin e pranuar nga Kosova.

“Në atë situatë nuk kemi qenë shumë të fokusuar dhe kroatët na ndëshkuan. Si kolektiv kjo ka qenë ndeshja më e mirë. Mendoj se e kemi përmirësuar lojën dhe mendoj se duhet ta kemi kokën lartë dhe të shkojmë për rezultat pozitiv kundër Finlandës,” ka thënë Alushi pas ndeshjes.

Alushi ka qenë për 90 minuta në fushë në ndeshjen që nisi dje e përfundoi sot, ndërsa Kosova ka pësuar humbjen e gjashtë në 7 ndeshje kualifikuese.

Të martën, 5 shtator, Kosova pret Finlandën në Shkodër.