‘Angazhim i jashtëzakonshëm solli pikë’

Vëllaznimi ka arritur të mbajë formën e mirë në Superligës, duke arritur të fitojë pikë edhe në mysafirllëkun e vështirë në Prishtinë. 

Ekipi kuqezi nga Gjakova ka barazuar pa gola me Prishtinën sot, derisa trajneri i gjakovarëve, Genc Hoxha, pas ndeshjes ka thënë se për këtë rezultat është meritor angazhimi i jashtëzakonshëm i futbollistëve. 

”Është një pikë shumë e madhe e fituar, shumë e rëndësishme në momentin më të duhur pas dy fitoreve. E arritëm me shumë mund dhe angazhim të jashtëzakonshëm të këtyre futbollistëve shumë të rinj që po rriten për çdo ditë të cilët i uroj për angazhimin, për lojën, disiplinën dhe gjithçka që treguan në këtë takim. Është shumë pikë e vlefshme për ne,” ka thënë Hoxha, transmeton faqja zyrtar e klubit të Prishtinës sot. 

Vëllaznimi është vetëm një pikë mbi zonën e rrezikshme që dërgon në Play-Out të Superligës. 

Ekipi gjakovar pas dy fitoreve me radhë të shënuara, sot ka marrë edhe një pikë, që në tre xhirot e fundit u ka mundësuar atyre të tubojnë 7 pikë dhe të kapin pozitën e tetë të tabelës. 

Vëllaznimi në xhiron e ardhshme të Superligës pret liderin, Ferronikelin, që nuk din për humbje në pjesën pranverore të kampionatit.