Arsenali më frikësohet

Sulmuesi anglez i Manchester Unitedit, Wayne Rooney, i ka shtuar edhe pak barut zjarrit të derbit të fundjavës në Angli ndërmjet ekipit të tij dhe liderit të Premier League-së, Arsenal. 

“Me siguri ata frikësohen nga paraqitja ime në fushë,” ka thënë Rooney 28 vjeç para derbit në Old Trafford. 

Topçinjtë e Londrës gjatë viteve të fundit kanë pasur probleme me Rooneyn i cili ka shënuar në disa momente të paharrueshme. 

Super goli i tij me Evertonin në vitin 2002, duke u bërë emër në Premier League. Pastaj dy vite më vonë, pasi që kaloi në Manchester United, ai nxorri penalltinë e famshme të shënuar nga Ruud Van Nistelrooy, i cili ia prishi rekordin e 49-të ndeshjeve pa humbje në Highbury të atëhershëm. 

Arsenali ishte përsëri viktimë e Rooneyt, kur ai shënoi golin e 100-të në Premier League. E me këtë gol, Arsenal u bë ekipi i cili ka pranuar më së shumti gola individualisht nga Rooney. 

Arsenal është lider i Premier League-së angleze, derisa Manchester United nuk ia ka nisur mirë stinorit me David Moyesin në krye. Topçinjtë për herë të fundit kanë mposhtur Manchesterin më 1 maj të vitit 2011.