Basha ndal Romën perfekte

Perfekcioni romak ka përfunduar sonte. Pas dhjetë xhirove me fitore dhe thyerjes së rekordit të klubit dhe barazimit të rekordit historik të Milanit, romakët janë ndalë nga një ish lojtar i tyre sonte në Torino. 

Ka qenë Alessio Cerci që ka shënuar golin e barazimit për Torinon, gol ky që ka qenë i dyti i pranuar në stinor nga portieri Morgan De Sanctis i Romës. 

Roma kishte kaluar në epërsi në pjesë të parë pas një asistimi nga e majta e boshnjakut Miralem Pjanic, për Kevin Strootmanin që nuk e pati vështirë të shënojë për udhëheqjen e ‘ulkonjës’. 

Sulmet e shumta të Romës pas golit të pranuar nuk kanë arritur të kalojnë kalanë torineze në Olimpico të Torinos, ku është dalluar edhe përfaqësuesi i kombëtares Migjen Basha që ka qenë në fushë për 90 minuta duke i bërë ballë romakëve. 

Roma vazhdon të jetë lidere e Serie A-së, por Torinoja i ka bërë një favor të madh rivalit lokal Juventusit, duke mos e lënë Romën larg tyre. 

Rezultatet dhe tabela aktuale.