BAYERN 5-2 FRANKFURT
Bayerni thellon krizën e Frankfurtit, zgjëron serinë e fitoreve
23 May, 2020 @23:49
Në ndeshjen e fundit të ditës në kuadër të xhiros së 27, kampioni aktual i Bundesligës, Bayern Munchen, e mposhti Eintracht Frankfurtin me rezultat 5-2.
Goli i parë në ndeshje erdhi në minutën e 17’ nga Leon Goretzka, pas një asistimi të Thomas Mullerit.
Pikërisht Mulleri në minutën e 41’ e dyfishoi epërsinë, derisa pjesa e parë u mbyll me rezultat 2-0 në favor të Bayernit.
Me të filluar pjesa e dytë, Robert Lewandowski shënoi për 3-0 në minutën e 46’.
Për Frankfurtin lojtari austriak Martin Hinteregger shënoi dy herë (52’,55’) dhe ngushtoi epërsinë 3-2, kurse në minutën e 61’ Alphonso Davies shënoi golin e rehatisë për Bayernin.
Në minutën e 74’ shënuesi i dy golave të Frankfurtit, Hinteregger, kësaj radhe i ngatërroi portat dhe shënoi një autogol që ishte edhe rezultati përfundimtar i ndeshjes 5-2 në të mirë të Bayernit.
Kjo ishte fitorja e gjashtë rresht për bavarezët dhe me 4 pikë më shumë se Dortmundi gjendet në krye të tabelës.
Frankfurti në pesë ndeshjet e fundit nuk arriti t’i gëzohet fitores. Me 28 pikë gjendet në pozitën e 13.
Në xhiron tjetër do të luhet derbi në mes të Dortmundit dhe Bayernit, kurse Frankfurti do të takohet me Freiburgun.