BERSANT CELINA
Celina stërvitet me ekipin e parë
23 December, 2014 @16:58
Njëri prej futbollistëve më të dallur në akademinë e skuadrës së Manchester Cityt, Bersant Celina, dita ditës po i afrohet më shumë ekipit të parë të Manchester Cityt që po drejtohet nga Manuel Pellegrini.
Celina sot është stërvitur me ekipin e parë të Cityt, së bashku me yjet e shumtë të kësaj skuadre, gjë që ka krijuar përshtypjen se 18 vjeçari në një të ardhme të afërt edhe mund të debutojë me ekipin e parë.
Reprezentuesi i përfaqësueses së Kosovës është pjesë e ekipit U18 të Manchester Cityt, ndërsa kohëve të fundit ka filluar të angazhohet edhe me ekipin U21 të kësaj skuadre.
Më parë, me ekipin e parë të Cityt është stërvitur edhe futbollisti tjetër nga Kosova, Sinan Bytyqi, i cili ka pasur edhe disa paraqitje në miqësore, mirëpo ende nuk ka debutuar në ndonjë ndeshje zyrtare me ekipin e parë. Bytyqi luan për ekipin U21 të Manchester Cityt.
