City zyrtarizon Sanen

Manchester City para pak çastesh ka zyrtarizuar reprezentuesin gjerman, Leroy Sane, si lojtar të ri të ekipit. Sane dje udhëtoi në Angli për teste mjekësore, ndërsa marrëveshja u zyrtarizua sot.

I ardhur nga Schalke 04 për 37 milionë funte + bonuset që do të paguhen më vonë, Sane do të veshë fanellën me numër 19 te ekipi nga “Etihad”.

“Me të vërtetë ndihem mirë. Jam i lumtur që jam këtu dhe që ka funksionuar gjithçka mirë për të ardhur unë këtu. Tash do të përqëndrohem vetëm te City,” ka thënë Sane për faqen zyrtare të ekipit mancity.com.

“Njëra ndër arsyet e ardhjes sime këtu është Pep Guardiola. Ai më ka bindur se zhvillimi im do të vazhdojë në rrugë të duhur këtu. E di se duhet të mësojë shumë, por kjo do të jetë një hap për ngritje në karrierën time,” ka shtuar Sane.

Sane 20 vjeç ka nënshkruar kontratë 5 vjeçare me Manchester Cityn.