Debuton Celina

Bersant Celinës i është realizuar ëndrra. Reprezentuesi i përfaqësueses së Kosovës ka debutuar në ekipin e parë të Manchester Cityt në ndeshjen e sotme miqësore kundër Hamburgut, që u zhvillua në Abu Dabi të Emirateve të Bashkuara Arabe.

Celina u inkuadrua në lojë në minutën  77’ duke e zëvendësuar Edin Dzekon, i cili menjëherë pasi e shënoi golin e dytë të Cityt, ia lëshoi vendin e tij 18 vjeçarit me prejardhje nga Prizreni.

Rreth 15 minutat e fundit të ndeshjes Celina luajti në vijën e sulmit së bashku me argjentinasin Kun Aguero, ndërsa në minutën 92’ e kishte edhe një rast të mirë për të shënuar, por goditja e tij jashtë zonës së rreptësisë, shkoi larg lartë portës kundërshtare.

Debutimi i Celinës erdhi vetëm pas grumbullimit të tij të dytë në një ndeshje me ekipin e parë.