MITROVICË
Derbi lokal, i takoi Trepçës’89
12 April, 2015 @16:03
Skuadra e Afrim Tovërlanit ka arritur të shënojë fitore në derbin lokal të qytetit të Mitrovicës sot ndaj atij të Ajet Shoshollit.
Trepça’89 ka qenë dukshëm më e mirë se Trepça në këtë takim, derisa golashënuesi më i mirë i stinorit të kaluar në Superligë, Blerand Kurtishaj hapi serinë e golave për 89’shin, pas një asistimi nga Argjend Mustafa.
Më pas, Ibrahim Peci, mister penalltia e 89’shit, ka shënuar nga afro 18 metra largësi me një goditje të tij precize, për të dërguar skuadrën e tij me epërsi komode në pushim.
Trepça pas zëvendësimeve të bëra nga trajneri Shosholli sadopak ishte këndellur në pjesë të dytë kur edhe uli epërsinë përmes Denis Krasniqit, që pranoi një top të mirë nga kapiteni Shpëtim Babaj.
Por, dilemave të fituesit i dha fund Kushtrim Lushtaku që qëlloi për të vendosur përfundimtaren 3-1 në të mirë të Trepçës’89.
Kjo është fitorja e dytë e Tovërlanit në 3 ndeshje me Trepçën’89 që tash ngritet në pozitën e pestë të tabelës, derisa rivali lokal i tyre, duket se po i vështirësohet mbijetesa.
