Drama i takon gjermanëve

​Dy ndeshje, 210 minuta dhe 10 gola. Kjo ishte historia e dy ndeshjeve të 1/8 së finales ndërmjet Bayernit e Juventusit. Pas sfidës së parë në Torino, e cila u mbyll 2-2, edhe ndeshja e dytë në Gjermani dhuroi dramë, e cila në fund u mbyll me kualifikimin e gjermanëve.

Përkundër mungesave të shumta në formacion, Juventusi i Allegrit arriti të krijonte epërsi të dyfishtë në pjesën e parë me golat e Pogbas dhe Cuadrados, mirëpo vendasit nuk u dorëzuan deri në fund dhe me golat e Lewandowskit e Müllerit në pjesën e dytë, arritën ta dërgojnë ndeshjen në vazhdime.

30 minutat e vazhdimeve ishin totalisht të bavarezëve, të cilët me golat e Alcantaras dhe Comanit, arritën ta fitonin ndeshjen dhe kështu e siguruan kualifikimin për në çerekfinale. Të dy lojtarët që shënuan golat e fitores u inkuadruan nga banka rezervë.

Me Bayernin, të gjitha skuadrat çerekfinaliste janë kompletuar. Lista e plotë: Bayern, Real Madrid, PSG, Benfica, Barcelona, Wolfsburg, Atletico Madrid, Manchester City.