DRITA vs BESA
Drita nuk mposhtet, barazon me Besën
1 December, 2016 @15:09
Skuadra e Dritës sot ka treguar një paraqitje mjaft të mirë ndaj Besës, që ka pasur mungesa në ekipin bazë.
Sidoqoftë, sulmet e fillimit të takimit të Dritës iu kthyen mbrapsht vendasve, kur pas një kundërsulmi të shpejt Leart Emini gjeti Diar Miftarajn që udhëhoqi topin drejt portës për të shënuar thuajse i vetëm përballë Artan Latifit për epërsinë e ekipit të Gani Sejdiut.
Disa minuta para golit, trajneri i Dritës, Ismet Munishi, ishte përjashtuar nga ndeshja për shkak të ankesave ndaj referimit. Ai vazhdimin e ndeshjes e ndoqi nga tribunat, ndërsa Drita u bë edhe më e fortë në fushë.
Pasoi një furi e gjilanasve në pjesë të dytë, derisa pas disa tentimeve topi vjen te braziliani Gilberto Fortunato, që shënoi për barazim, 1-1.
Bardhekaltërit tentuan edhe në disa raste, por portieri i Besës, Granit Kolshi, ka qenë në nivel të lartë sot, pasi që ka mbrojtur disa tentime të mira të vendasve.
Në fund, ekipet disi u pajtuan me barazim, derisa gjyqtari Besfort Kosumi sinjalizoi fundin e ndeshjes pas 3 minutave shtesë në “Selami Osmani” të Gjilanit.
