Duhet angazhim i madh për fitore

Selektori i Kosovës, Bernard Challandes, në prag të ndeshjes ndaj Maltës sonte, ka folur në konferencë për shtyp dhe ka bërë të ditur se ekipit i duhet angazhim i madh për të arritur fitoren.

Kosova mund të sigurojë Ligën C që sonte, në rast se fiton dhe në duelin tjetër Azerbajxhani nuk fiton.

“Unë e pranoj që shikuesit në Kosovë mendojnë se ne po luajmë kundër Maltës dhe do të jetë shumë e mundshme të arrijmë fitore, por unë si trajner asnjëherë nuk mendoj në atë formë dhe këtë e kam për detyrë t’ua bëjë të qartë edhe lojtarëve se nuk ka ndeshje të lehtë dhe duhet angazhim i madh për fitore. Malta është skuadër shumë e fortë, sidomos kur luan në shtëpi. Jam befasuar me paraqitjen e Maltës kundër Azerbajxhanit, pasi atje shkuan dhe barazuan vetëm tri ditë pas ndeshjes sonë. Unë e kam parë atë ndeshje dhe për këtë arsye kam respekt kaq të madh për Maltën”, ka thënë Challandes në konferencë për shtyp.

Selektori i Kosovës ende nuk është mposhtur në ndeshje zyrtare me Kosovën dhe seria pozitive për vendin tonë po vazhdon.

Dueli Malta-Kosova luhet sonte në ora 18:00.