Edhe Barcelona e kërkon Januzajn
8 October, 2013 @20:41
Kosovari Adnan Januzaj është bërë shënjestër e Barcelonës. Kështu ka raportuar sot The Daily Mail, që ka thënë se katalonasit janë duke vëzhguar situatën e tij të paqartë me Manchester Unitedin dhe presin që të futen në lojë në momentin e duhur.
Januzaj 18 vjeçar shkëlqeu në fundjavë në ndeshje ndaj Sunderlandit, duke i sjellur Manchester Unitedit fitore me dy golat e tij, derisa kjo ishte ndeshja e parë e tij si startues te djajt e kuq.
Kontrata e Januzajt skadon verën e ardhshme, e përditshmja angleze shkruan se Barcelona ka përcjellë situatën e kosovarit me pasaportë belge që nga koha e kalimit të tij prej Anderlechtit në Manchester United.
Derisa kampioni i Anglisë është duke e përgatitur një ofertë shumë të bujshme për kontratë të re me Januzajn, Barcelona e sheh veten në garë për të marrë shërbimet e talentit kosovar si lojtar i lirë në verën e ardhshme.
“Nuk do t’ju them cilat ekipe janë të interesuara për atë. Por mund t’ju them se janë disa ekipe europiane që e kërkojnë,” kishte thënë agjenti i tij, Dirk De Vriese javën që shkoi.
