Fitore e madhe e Ferizajit, shton shpresat për shpëtim

Me fitoren e Ferizajit është mbyllur dueli i luajtur sot në stadiumin me bari sintetik në Ferizaj, ku skuadra vendase me po të njëjtin emër arriti ta mposhtë me shifrat 3-1 skuadrën e Flamurtarit nga kryeqyteti.

Të parët në epërsi kaluan vendasit, të cilët golin e gjetën nga pika e bardhë përmes Egzon Shabanit në minutën e 21’ të ndeshjes, derisa reagimi i vendasve ishte pothuajse i menjëhershëm. Një dalje jo e menduar mirë e portierit Blakqori pas krosimit të Dumanit të mysafirëve, e gjeti në zonë mirë bullgarin Angel Grançov, i cili barazoi me kokë për 1-1, rezultat me të cilin u mbyll pjesa e parë.

TABELA AKTUALE

Me të filluar pjesa e dytë, ishte bullgari Grançov, golashënuesi i Flamurtarit ai që e la në ‘baltë’ skuadrën e tij. Grançov u ndëshkua me dy të verdhë brenda dy minutave, për ta lënë skuadrën e tij me 10 lojtarë në terren.

E këtë gjë e shfrytëzoi maksimalisht Ferizaji, i cili pas sulmeve të njëpasnjëshme, fillimisht e gjeti golin e epërsisë përmes Qëndrim Dautajt, i cili pas asistimit nga Qerkini shënoi mjeshtërisht me të majtën për 2-1 në minutën e 88’ të ndeshjes, e më pas Ferizaji e vulosi fitoren me golin e Hysein Demirit në minutën e katërt të kohës shtesë, për ta mbyllur ndeshjen me fitore 3-1 dhe me 3 pikë shumë të vlefshme në luftën për mbijetesë.

Para golit të shënuar, Ferizaji e goditi dy herë shtyllën, derisa pati edhe shumë raste të tjera, por goli iu mohua disa herë nga pritjet fantastike të portierit Neziri të mysafirëve.

Për Ferizajin kjo fitore mund të jetë vendimtare në luftën për mbijetesë, derisa lajm i mirë për këtë skuadër është edhe barazimi i sotëm mes Lirisë e Ballkanit në Prizren, kurse sa i përket Flamurtarit, edhe kjo skuadër ndodhet në zonën e barazhit momentalisht.

Xhiron e ardhshme, Ferizaji i shkon Ballkanit në Suharekë, kurse Flamurtari e pret KEK-un në kryeqytet.

FORMACIONET STARTUESE