Fundjava me FA Cup

Rikthehet fundjava me FA Cup. Në Wembleyn mitik këtë fundjavë zhvillohen duelet gjysmëfinale të trofeut më të vjetër të historisë së futbollit. Krahas ndeshjeve të Premier Leagues, vëmendja e publikut do të jetë e koncentruar edhe në dy ndeshjet e FA Cup.

Gjysmëfinalja e parë zhvillohet të shtunën me fillim nga ora 18:15 ndërmjet Evertonit dhe Manchester United. Të dy skuadrat nuk po kalojnë sezon të mirë dhe triumfi në kupë do të ishte mbyllje e bukur e sezonit. United nesër vuan nga mungesat e Schweinsteiger, Shaw, Januzaj e Will Keane kurse tek Evertoni mungojnë Funes Mori dhe Seamus Coleman, ndërsa në dyshim mbeten Jagielka, Stones dhe Barry.

Ndeshja e dytë gjysmëfinale luhet gjithashtu në Wembley të dielën me fillim nga ora 17:00 ndërmjet Crystal Palacet dhe Watfordit. Arritja e këtyre dy skuadrave në Wembley është sukses në vete, ndërsa triumfi eventual do të ishte një befasi e këndshme për futbollin anglez.

Ndeshje kthyese nuk ka. Në rast barazimi, fituesit përcaktohen me vazhdime apo eventualisht penallti.

Finalja e FA Cup zhvillohet më 21 maj gjithashtu në Wembley.