Gjibraltari me rezultat historik

Kolonia britanike në fund të Spanjës dhe vetëm 5 kilometra larg kontinentit afrikan, Gjibraltari, mbrëmë ka zhvilluar ndeshjen e parë ndërkombëtare pas pranimit në UEFA e FIFA. 

Rezultati i parë i tyre në një ndeshje të pranuar nga FIFA ka qenë barazimi 0-0 me Sllovakinë. Ata kanë luajtur si vendas në Algavre të Portugalisë, pasi që stadiumi i vetëm i qytetit shtet nuk i përmbush kriteret për ndeshje ndërkombëtare dhe po rinovohet. 

Futbollistët nga Twitter e Facebook

Barazimi i mbrëmshëm bëhet edhe më i vlefshëm për këtë skuadër kur kihet parasysh se ata kanë rekrutuar lojtarë nga rrjetet sociale si Twitter e Facebook, prej së cilave kanë rënë në kontakt edhe me ish qendërmbrojtësin e Stoke Cityt, Danny Higginbotham, që është nip i përzgjedhësit të kësaj përfaqësueseje të re europiane, Allen Bulla. 

Higginbotham, ka fituar të drejtën të luaj për këtë vend pasi që gjyshja e tij ka prejardhjen nga kjo koloni. E Higginbotham ka debutuar në kombëtare në moshën e tij 34 vjeçare. 

Ëndrra u realizua

Qindra tifozë, përfshirë edhe kryeministrin e këtij vendi, Fabian Picardo, kanë qenë të pranishëm në ndeshjen e cila në fund u bë festë për ata. Stadiumi i Algavres që ka kapacitet prej 30 mijë ulëseve, në përgjithësi ka qenë i zbrazët, por kjo ka pasur pak rëndësi për futbollistët e entuziazmuar të këtij vendi. 

“Ky është rezultat për tu krenuar, ndërsa lojtarët kanë dhënë më shumë se 100% nga vetja. Ka qenë ëndërr e jona për të luaj ndeshjen e parë miqësore ndërkombëtare të pranuar nga organet e larta të futbollit, ndërsa ëndrra tjetër u realizua duke nxjerrë rezultat tepër të mirë,” ka thënë përzgjedhësi Allen Bula pas ndeshjes. 

Sllovakia ka qenë pjesëmarrëse e Kampionatit Botëror Afrika e Jugut 2010 dhe kjo e bën rëndësinë edhe më të madhe të barazimit të Gjibraltarit me ata. Sa i përket ndeshjes, të dyja skuadrat kanë pasur raste për të shënuar, por asnjëra nuk e ka arritur këtë. 

Pranimi nga FIFA dhe historia

Federata e Futbollit të Gjibraltarit është themeluar në vitin 1895 dhe ka aplikuar për pranim në FIFA në vitin 1997 me mbështetje të Anglisë. FIFA rastin e procedoi te UEFA, e cila së fundi e pranoi këtë vend në rrjetin e saj. 

Gjibraltari ka kundërthënie të mëdha me Spanjën si territor, që nuk e pranon ekzistimin si shtet të këtij vendi. Forcat anglo-holandeze kishin pushtuar këtë territor nga Spanja në vitin 1704, ndërsa vendi iu dha Britanisë me marrëveshjen e Utrechtit në vitin 1713. 

Spanja vazhdon me probleme

Të martën e kaluar Ministria e Punëve të Jashtme të Britanisë kishte thirrë ambasadorin e Spanjës lidhur me lëshimin e shumë anijeve kërkimore spanjolle në ujërat e Gjibraltarit. Anijet kërkimore të Spanjës kanë qenë si kundërpërgjigje për Gjibraltarin që kishte ndërtuar goma artificiale si kufinj në detin Mesdhe. E Spanja ka thënë se ata janë dashur të përforcojnë sigurinë, pasi që peshktarët e saj janë në rrezik nga këto ‘mure’ detare.

Në pritje të shortit

Sidoqoftë, Gjibraltari tashmë i pranuar në UEFA, me padurim pret të futet në shortin e radhës për Kampionatin Europian Franca 2016, ku do të garojë për herë të parë me mundësi kualifikimi në një garë të madhe me kombëtare.