GJILANI - HAJVALIA
Gjilani fundos Hajvalinë
23 October, 2016 @15:58
Skuadra e Gjilanit ka fituar 3 pikë të reja duke e mposhtur me rezultat minimal skuadrën e Hajvalisë.
Ndeshja e cila u desh të fillojë nga ora 14:00, u vonua për rreth 10 minuta për shkak se skuadrat kishin fanella të njëjta, derisa Hajvalia si skuadër mysafire u detyrua t’i ndërrojë ato.
Me të filluar ndeshja, erdhi edhe goli për Gjilanin, pasi Qëndrim Sejdiu i Hajvalisë shënoi në portën e gabuar.
Ky ishte edhe goli i vetëm i ndeshjes, që solli fitoren e pestë të stinorit për Gjilanin.
Ndeshja që u luajt në stadiumin e qytetit në Gjilan, u zhvillua pa praninë e shikuesve, për shkak të dënimit të Gjilanit.
Hajvalia me këtë humbje ka mbetur i fundosur në fund të radhitjes tabelare, kurse Gjilani është renditur në pozitën e gjashtë me pikë të njëjta sikurse Besa.
