Humb Tottenham, largohet nga zona e Ligës së Kampionëve

Tottenhami ka humbur një mundësi të shkëlqyeshme për t’iu afruar zonës së Ligës së Kampionëve pas humbjes së djeshme të Leicesterit. Tottenhami është mposhtur si mysafir nga Leedsi me rezultatin 3-1.

Ndeshja nisi mirë për Leedsin të cilët kaluan në epërsi në minutën e 13 me golin e Dallas. Tottenhami e barazoi rezultatin përmes Son Heung-Min në minutën e 25, por Leedsi e riktheu epërsinë me golin e Bamford në minutën e 42. 

Në pjesën e dytë, sulmuesit të Tottenhamit, Harry Kane iu anuluan dy gola për pozicion jashtë loje, ndërsa rastet tjera mysafirët nuk arritën ti konkretizojnë në gol. Fitoren e Leedsit e vulosi Rodrigo në minutën e 84.

Me këtë humbje, Tottenhami mbetet në pozitën e 6 me dy pikë më shumë se Liverpooli, i cili ka dy ndeshje më pak. dhe pesë pikë më pak se Chelsea i pozitës së 4, i cili sot i shkon Manchester Cityt.