HUDDERSFIELD - SPURS
I pandalshmi Harry Kane, Tottenhami ngjitet
30 September, 2017 @15:19
Pas hat-trickut në mesjavë në Champions League, forma e shkëlqyeshme e Harry Kanet ka vazhduar edhe në ndeshjen hapëse të xhiros së shtatë në Premier League, ndeshje në të cilën Tottenhami u takua me Huddersfieldin.
Londinezët sot shënuan fitore të lehtë, me sulmuesin Harry Kane që nuk ka të ndalur këtë muaj. Kane sot realizoi dy gola, derisa dy golat e tjerë erdhën nga Davies dhe Sissoko dhe ndeshja u mbyll me rezultatin përfundimtar 0-4.
Sa i përket statistikave individuale, Harry Kane tashmë ka shënuar 27 gola në Premier League gjatë gjithë vitit 2017, ndërsa nëse kjo formë vazhdon, ky lojtar mund ta thyej rekordin e 36 golave në një vit kalendarik, rekord ky që mbahet nga legjenda Alan Shearer në vitin 1995. Gjithashtu, nga 26 kundërshtarët me të cilët është përballur përgjatë sezoneve në Premier League, Harry Kane ka shënuar të paktën një gol ndaj 25 prej tyre. Vetëm Cardiffi ka shpëtuar pa pranuar gol nga ‘Hurrikane’.
Kjo është hera e parë që nga sezoni 1960/1961 që Spurs arrijnë të fitojnë 4 ndeshje radhazi në takimet jashtë shtëpisë në kuadër të Premier Leagues, ndërsa kjo fitore i ngjit ata në kuotën e 14 pikëve dhe i afron shumë me kreun e klasifikimit.
