Ku do të përfundojë Nainggolan?

Mesfushori belg, Radja Nainggolan, është në shitje. Kështu ka njoftuar shefi i skuadrës së Cagliarit, Massimo Cellino, bën të ditur Foot Italia sot. 

“Nëse do të isha i interesuar vetëm në para, siç mendojnë disa, unë do t’ia shitja Nainggolanin një klubi jashtë Italisë,” ka thënë Cellino për Corriere dello Sport, transmeton Foot Italia. 

“Drejtori gjeneral i Juventusit, Beppe Marotta, më ka pyetur për atë së pari, ndërsa aty është edhe Milani dhe shoku im, Adriano Galliani.” 

Në anën tjetër, dy ditoret tjera sportive kanë dalë me njoftime që qartësojnë sadopak dilemën e belgut 25 vjeçar. 

Tuttosport ka sjellë deklaratën e kryetarit të Juventusit Andrea Agnelli sot, ku ai ka thënë se nuk pret ndonjë përforcim në janar. 

Derisa La Gazzetta dello Sport pohon se Milan është ‘i pari në listë’ për të siguruar shërbimet e ish lojtarit të Piacenzas që ka zgjuar interesimin e shumë klubeve. 

Se ku do të përfundojë Nainggolan mbetet të shihet kur vjen janari, përkundër se sipas lajmeve të sotme nga gazetat italiane duket qartë se Milan është shumë më afër sesa Juventus në sigurimin e shërbimeve të tij.